حسنة ام اللبن صارت سياسية

سلام عليكم قبل لا تقره حبيت اوضح ان هذا قصيده على الحكومه لان بصراحه حكومتنه سوته بلا ملح

الشاعر احمد الياسري

عدنه شلون دولة وبيها حرية
حسنة ام اللبن صارت سياسية
حسنة شلون لعبت بالخلك طوبة
راحت للسياسة وعافت الروبة
الفضائيات كلها عليها مكلوبة
وامريكة ياربي بيها مسبية
حسنة ام اللبن صارت سياسية

حسنة لفلفت كلشي بعبايتها
وسبعة الاف من تمشي حمايتها
بسوك العالم مشكله وزارتها
وحكومتها حكومة محوة امية
حسنة ام اللبن صارت سياسية

طلابتنة جبيرة وحسنة حبابة
وبوش يكول هي تحل الطلابة
حسنة للحكم صعدت بدبابة
وكامة ترسملنه خطط امنية
حسنة ام اللبن صارت سياسية

ياناس على حسنة بعد ما نعتب
لان مكرودة لا تقرة ولا تكتب
ملتهية تفرهد بينه وتسلب
وحصتها بنفطنه الف بالمية
حسنة ام اللبن صارت سياسية

ماندري وية حسنة شلون تاليها
ياناس وتعبنة من بلاويها
لان دولتها حاميها حراميها
حظنه الوكعانه بحلك واوية
حسنة ام اللبن صارت سياسية

كالوا حسنه راح تعالج الاحباط
وتذب شيلة فكرها وترد تلبس قاط
وتاسس حكومة كلها تكنوقراط
وتعالج بناء البنى التحتية
حسنة ام اللبن صارت سياسية

لبست قاطها وتسودنة حسنة
وردت تزمخ علينه وتفارسنة
درجعلي للبن مو خرب واهسنة
عساها بخت من سواج حزبية
حسنة ام اللبن صارت سياسية

سودة بوجة حسنة ام اللبن صارت سياسية‬